POLAS TERRAS DA RAÍÑA LUPA

Percorrendo o Couto de Francos

A andaina circular (7 km) que percorrerá boa parte das antigas terras do Couto de Francos que pertenceu ó Condado dos Altamira, na actualidade linde natural dos Concellos de Teo, Brión, Rois e Ames.

Unha paisaxe mítica cunha perfecta harmonía entre o patrimonio natural, a arquitectura popular e os bens arqueolóxicos e etnográficos situados na contorna do Camiño Portugués e na bacía do Río Tinto. Lugares onde o lendario xacobeo deixou fonda pegada e marcou a historia do val da Maía, coa carballeira do Campo da Feira da Rúa de Francos (a Devesa dos Condes) como epicentro destas antigas terras da Raíña Lupa. O Castro Lupario ou de Francos, a medio camiño entre Iria e Compostela, o petróglifo do Faramello, o Camiño Real, a Ponte de Paradela, o Cruceiro Gótico da Rúa de Francos, os vestixios das primeiras industrias teenses, a arquitectura popular da Maía, son algúns dos puntos de interese desta ruta na véspera da Feira do San Martiño.