O Servizo de Bono Social Eléctrico lévase a cabo todos os mércores, de 10.00 a 12. 00 horas, no Salón de Plenos
Parroquia
Lampai
Achégase o San Martiño, a feira tradicional que se celebra todos os 11 de novembro na carballeira de Francos, na parroquia de Calo. E antes do gran día no que o espazo se encherá de cabalos, carpas de polbo e sobre todo milleiros de persoas de Teo e de fóra do Concello comezará unha programación previa este mesmo sábado.
O sábado 5 de novembro ás 19:00 horas proxectarase o documental "Frankenstein 05155" sobre o accidente do Alvia en Angrois na escola de Francos. Despois do visionado da cinta realizarase un coloquio co director. O domingo 6 ás 11:00 horas haberá un percorrido a pé pola Ruta do túnel. Serán seis quilómetros de dificultade baixa saíndo dende o Cruceiro de Francos. E ás 17:30 horas, de novo na escola, poderase ver o espectáculo "Lavandeiras" de Contos da boa pipa para todos os públicos.
Na véspera da feira, na noite do xoves, xa haberá animación con numerosos postos de polbo e churrasco. Dende o Concello programouse para ese momento unha noite de regueifeiros e a actuación dunha charanga e dun DJ. Esta animación festiva comezará dende as 21:30 horas.
O venres 11, festivo local en Teo, a feira encherase dende moi cedo coa chegada dos cabalos, elemento central do San Martiño. Ademais haberá numerosos postos de venda de produtos: artesanía, aparellos de labranza, produto labrego, comida ou téxtil...
Dende o Concello lémbrase que haberá zonas de aparcamento de balde antes de chegar á carballeira. Tamén convén lembrar que esta feira se sigue celebrando nun entorno natural privilexiado como é a carballeira de Francos, polo que se recomenda ser respectuoso co medio tentando non deterioralo.
Máis novas
