Nova edición do Campus de Verán do RC Celta en Teo

Esta mañá presentouse no Concello unha nova edición do Campus de Verán 2026 by Cabreiroá do RC Celta, que se levará a cabo no Campo Municipal da Cañoteira, en Cacheiras. Será entre os días 20 e 24 de xullo e está organizado pola Fundación Celta, en colaboración co Concello de Teo. Os interesados teñen ata o 15 de xullo para anotarse na páxina oficial do RC Celta, no apartado de campus de verán.

Esta oferta formativa está pensada para a rapazada de entre 5 e 16 anos. Durante toda a semana contarán con adestramentos afíns á metodoloxía do club vigués, así como a posibilidade de recibir o Premio Afouteza, que consiste nun adestramento coa canteira celeste da categoría correspondente. Ademais, os nenos e nenas que participen recibirán a roupaxe de adestramento e a merenda diaria. 

O obxectivo final é formar aos máis pequenos desde unha perspectiva amena e divertida, xa que tamén haberá espazo para opcións recreativas, ademais de practicar unha actividade física ao aire libre. O último día terá lugar a cerimonia de clausura, coa entrega de diplomas e sorteo de regalos, onde tamén poderán estar os familiares dos participantes. 

A alcaldesa, Lucía Calvo de la Uz, acompañada polo concelleiro de Deportes e Xuventude, Gelucho Gómez, mantivo esta mañá unha xuntanza co coordinador e director dos Campus e Escolas Deportivas Fundación Celta de Vigo, Manuel Gómez, para coñecer de primeira man a oferta do club para a cativada. 

Para anotarse, aquí: https://rccelta.es/fundacion/campus/