Obradoiro Dual de Emprego Rois-Teo 2026

O Concello de Teo publica as bases reguladoras do proceso de selección do alumnado-traballador e do persoal directivo, docente e administrativo de apoio do Obradoiro Dual de Emprego Rois-Teo 2026, un programa promovido polo Concello de Rois no que participa o Concello de Teo mediante o convenio subscrito entre ambas entidades.

O obradoiro contará con 20 alumnos e alumnas-traballadores/as, 10 de Teo e 10 de Rois, distribuídos en dúas especialidades formativas, con 10 participantes en cada unha:

- Operacións básicas en instalación e mantemento de xardíns e zonas verdes (AGA_C_002_3B).

- Operacións auxiliares de albanelería, revestimentos e pavimentos exterior (EOC_C_001_3B).

Durante o desenvolvemento do obradoiro realizaranse diferentes actuacións nos dous municipios. En Teo, os traballos estarán centrados no mantemento e conservación das sendas que forman parte da rede de roteiros turísticos do municipio, así como na adecuación do lavadoiro de Casalonga e a súa contorna.

O proxecto contempla tamén a contratación do persoal directivo, docente e administrativo necesario para o seu desenvolvemento: unha persoa para a dirección, unha persoa titora, dous mestres ou mestras correspondentes ás especialidades formativas e unha persoa para tarefas administrativas.

As bases e as distintas fases do proceso selectivo serán publicadas no taboleiro de anuncios e nas páxinas web dos Concellos de Teo e Rois, onde se irá incorporando a información relativa ao desenvolvemento do procedemento.

O prazo e o calendario das distintas fases do proceso de selección serán comunicados ás persoas candidatas unha vez realizada a correspondente sondaxe e recibidas ou comprobadas as candidaturas remitidas pola Oficina de Emprego.