O Concello de Teo ofrece ás persoas empadroadas unha visita gratuíta á Casa de Rosalía de Castro

A Fundación Rosalía de Castro, coa que o Concello de Teo mantén un convenio de colaboración, facilita a visita de particulares á casa museo ás persoas empadroadas neste Concello de maneira gratuíta nos próximos meses, mentres as medidas contra a Covid non permitan as visitas guiadas para grupos.

Para certificar ser habitante deste Concello é suficiente con presentar o DNI na entrada á Casa, sen necesidade de cita previa, ou, para as persoas empadroadas que non teñan o enderezo actualizado no DNI, manifestando esta circunstancia e solicitándoo no correo-e politicalinguistica@teo.gal.

A visita á casa serve para entender a importancia de Rosalía como figura central da cultura galega e como eixo dunha familia que funcionou como unha auténtica factoría cultural ao servizo do Rexurdimento.

O Concello de Teo asinou o convenio de colaboración coa Fundación Rosalía de Castro, representada polo seu presidente Anxo Angueira. En virtude deste convenio, tanto os escolares do municipio como as asociacións culturais poderían ter visitas guiadas de balde á Casa de Rosalía, co que, no contexto actual non se poden facer. Para reverter esta situación a Fundación ofreceu visitas gratuítas a toda persoa empadroada no Concello de Teo, no período no que as grupais non poidan realizarse por mor da Covid-19.

Rafa Sisto, o alcalde do Concello de Teo, asinou en febreiro de 2020 un convenio de colaboración coa Fundación Rosalía de Castro, que o converte no terceiro concello Mecenas da Casa de Rosalía dentro do proceso de subscrición popular para implicar a empresas, entidades públicas e persoas individuais na mellora e no sostemento da causa común da Casa da Matanza, “que é a causa común de Galicia”, en palabras do seu presidente Anxo Angueira.

En virtude deste convenio anual polo que o Concello de Teo achega 1.000 euros, tanto os escolares do municipio como as asociacións culturais poderán ter visitas guiadas de balde á Casa de Rosalía. Con esta decisión Teo refrenda así o seu compromiso histórico con esta institución, dado que xa apoiara economicamente en 1984 cunha doazón de 10.000 pesetas.

Centos de persoas de todo o país -e máis alá- xa se converteron en Amigas da Casa de Rosalía ao apoiar desde 20 euros ao ano a independencia económica e cultural desta institución, así como a súa sostibilidade financeira. A subscrición popular está a ser un grande éxito e moitos pequenos negocios tamén son xa Protectores (desde 60€/ano), así como varias grandes empresas da comarca, que xunto cos concellos poden exercer de Mecenas da Casa a partir de 1.000 euros ao ano.

Segunda subscrición popular

A Casa de Rosalía está sostida pola Fundación Rosalía de Castro, unha fundación privada sen ánimo de lucro que foi creada en 1947 por persoas vencelladas ao galeguismo nos tempos difíciles da ditadura. A apertura da Casa-Museo en 1972 só foi posible grazas á colaboración económica de familias e empresas e institucións de todo o país e do mundo da emigración.

Daquela participaron centos de persoas anónimas de Galicia a partir da proposta de José Manuel Rey de Viana, organizáronse colectas en moitas vilas e en case todos os centros galegos na emigración, uníronse máis de 60 concellos, varios bancos, a Federación de Caixas de Aforros, o Celta de Vigo, a Federación Galega de Ciclismo e innumerables asociacións de todo o país. Ao final, colleitouse un total de 994.043 pesetas en 1971.

Case 50 anos despois esta institución –que non recibe financiamento público regular que asegure o seu mantemento anual nin o seu futuro– quere reafirmarse na súa independencia económica e cultural e no apoio das xentes comprometidas co país e coa súa cultura.

Autofinanciamento do 41%

A Casa-Museo xa ten unha taxa de autofinanciamento do 41% (2018, que evoluciona desde un 20% en 2012), cifra considerable na nosa contorna cultural, “mais entendemos que cómpre aínda percorrer camiño na procura dun mellor servizo a prol da difusión do legado de Rosalía e da súa familia”, afirma Anxo Angueira, presidente da Fundación. A evolución das visitas á Casa tamén é positiva: incrementáronse desde 2012 ata 2018 nun 237% (de 8.655 a 20.571).

A Fundación Rosalía quere continuar neste vieiro para “asegurar o seu presente e, sobre todo, o seu futuro, para seguir avanzando na mellora da Casa-Museo, da súa xestión e dos seus servizos”, continúase desde a Fundación, que afirma que é xa un dos museos galegos máis visitados “e debe estar na vangarda cultural e ser un referente a nivel nacional e tamén internacional”.

Anxo Angueira, referencia actual da institución rosaliana, salienta que “aínda que somos escoitados polas institucións públicas de Galicia, queremos que o esforzo colaborativo sexa tamén un esforzo comunal e compartido polo pobo galego, que sempre foi xeneroso con todo o que tiña que ver con Rosalía para que a Casa da Matanza e as súas instalacións sexan dignas da figura que representan”.

A Casa de Rosalía incrementou exponencialmente os proxectos e actividades desde 2012. Alén da desexada reforma do interior da Casa e da súa renovada musealización, catalogouse e dixitalizouse todo o fondo documental e acondicionouse unha sala para o arquivo, que xa está a disposición dos investigadores; dinamizouse a súa presenza na web e nas redes sociais; incrementouse o seu patrimonio coa chegada de novos obxectos, artísticos ou non, como o cadro de Brocos e diferentes pezas de Ovidio Murguía; publicouse a súa Obra completa, entre outros libros; relanzouse a celebración do Día de Rosalía e puxéronse en marcha ducias de actividades ao longo do ano: a homenaxe ao mundo do mar, o festival Abride a Fiestra, alén de múltiples exposicións, conferencias, roteiros, teatralizacións e visitas guiadas.

Poden descargar imaxes da sinatura do convenio aquí.

Vídeo “Faite Amiga/o da Casa de Rosalía”: https://youtu.be/4_rxqF4mGDI