O Servizo de Bono Social Eléctrico pasará a prestarse todos os mércores en horario de 10:00 h a 12:00 horas no Salón de Plenos.
A alcaldesa, Lucía Calvo de la Uz, recibiu esta mañá á directiva do Centro Cultural “A Ponte Vella”, para coñecer de primeira man o programa do seu novo festival, que se celebrará o vindeiro sábado, 13 de xullo, ás 19.30 horas no Centro Cultural, sito en Reis.
Ese día haberá actuación do seu grupo de baile, das pandereiteiras e da charanga, para amenizar a tarde. Ademais, como grupo convidado, participará o Grupo de Baile e Gaitas Santaia, de Santa Cruz de Oleiros.
Ese mesmo día, ademais do festival, tamén se celebrará a I Foliada “Camiño dos Arrieiros”, que comezará a partir das 22.00 horas no propio Centro Cultural. Nesta foliada tamén participarán o Grupo de Baile e Gaitas Santaia, a Asociación de Retranqueiros e o grupo Retrouso da A.C. A Fervenza de Ouzande, entre moitos outros.
A alcaldesa salientou o gran traballo deste Centro Cultural, o cal naceu no ano 1986 por iniciativa dun grupo de veciños da parroquia de San Cristovo de Reis, e felicitounos por todas as súas actuacións e polos premios acadados, que non son poucos precisamente, e animounos a seguir traballando así de ben para impulsar o folclore galego en xeral e o teense en particular por toda a xeografía española e fóra das nosas fronteiras. De feito, o Centro Cultural “A Ponte Vella” participou ata en tres ocasións no Festival Interceltique de Lorient (Francia), ademais de en numerosos certames nacionais e autonómicos.
